ភ្នំពេញ៖ ដើម្បីអបអរសាទរកម្ពុជាធ្វើជាម្ចាស់ផ្ទះរៀបចំការប្រកួតព្រឹត្តិការណ៍ស៊ីហ្គេម និងប៉ារ៉ាហ្គេមនៅរយៈពេល ៦៧ថ្ងៃខាងមុខ នាយករដ្ឋមន្ត្រីកម្ពុជា សម្តេចតេជោ ហ៊ុន សែន បានជំរុញឱ្យពលរដ្ឋខ្មែរបង្ហាញពីវប្បធម៌ និងប្រពៃណីខ្មែរដល់ភ្ញៀវទេសចរដែលមកចូលរួមព្រឹត្តិការណ៍ដ៏ធំមួយនេះដើម្បីជាចំណែកចូលរួមលើកកត្តិយស និងមុខមាត់កម្ពុជាទៅពិភពលោក។

សម្តេចបានមានប្រសាសន៍ថា៖ «ពលរដ្ឋរួមគ្នាលើកកិត្តិយស និងមុខមាត់កម្ពុជា តាមរយៈការបង្ហាញពីវប្បធម៌ (កម្ពុជា) ប្រពៃណី ម្ហូបអាហារ អត្តសញ្ញាណជាតិ ការស្វាគមរួសរាយរាក់ទាក់ ការរៀបចំតុបតែងភូមិឋាននៅតាមភូមិឋានរាជធានីខេត្តក្រុងស្រុកខណ្ឌ»។

ថ្លែងក្នុងទិវាជាតិទីក្រុងស្អាតលើកទី១១ ឆ្នាំ២០២៣ ក្រោមប្រធានបទ «ទីក្រុងស្អាត បដិសណ្ឋារកិច្ច ល្អម្ចាស់ផ្ទះកម្ពុជាមកដល់ភាពកក់ក្ដៅ និងពិធីប្រកាសជ័យលាភីទីក្រុងស្អាតលើកទី៣» នៅរសៀលថ្ងៃទី២៧ ខែកុម្ភៈ ឆ្នាំ២០២៣ សម្តេចបានលើកឡើងថា ក្រៅពីនេះ ការរក្សាបាននូវអនាម័យ និងការថែរក្សាបរិស្ថានក៏ជាភាពចាំបាច់ដែលពលរដ្ឋកម្ពុជាត្រូវតែអនុវត្តផងដែរដើម្បីទាក់ទាញភ្ញៀវទេសចរ និងធានាបាននូវសុខមាលភាព៕